Leonardo buyurtmalar portfeli ilk bor 60 mlrd yevrodan oshdi
Italiyaning mudofaa va aerokosmik xolding kompaniyasi Leonardo 2026-yil yanvar–sentabr oylarida yangi buyurtmalar hajmini oʻtgan yilning shu davriga nisbatan 28 foizga oshirib, 60,4 mlrd yevroga yetkazdi.
Kompaniya 60 mlrd yevrolik marradan ilk bor oshdi. Oraliq hisobotni direktorlar kengashi chorshanba kuni tasdiqladi, kompaniya natijalarni esa payshanba kuni eʼlon qildi.
Toʻqqiz oylik tushum ham oʻsdi, bundan tashqari, guruh faoliyat yuritadigan barcha yoʻnalishlarda tushum oshdi. Hozir Leonardo mudofaa sektori, aerokosmik soha, uchuvchisiz qurilmalar va yangi sanoat alyanslariga tayanmoqda. Iveco Groupning mudofaa boʻlinmasini sotib olgani ham kompaniyaning bozordagi mavqeini mustahkamladi.
Leonardo bosh direktori Lorenzo Mariani uch chorak yakunlari tanlangan strategiyani tasdiqlaydi, deb hisoblaydi. Uning soʻzlariga koʻra, kompaniyani moliyaviy barqarorlik, kuchli tijoriy taklif, yechimlarning keng qatori va ortib borayotgan ishlab chiqarish quvvatlari ajratib turadi.
Marianining aytishicha, navbatdagi vazifa — buyurtmalar portfeli hajmini amaldagi ishlab chiqarish va logistika imkoniyatlariga aylantirish. Kompaniya ishlab chiqarish va yetkazib berish hajmini bozorning hozirgi holati talab qilgan darajada oshirish uchun oʻz kompetensiyalarini rivojlantirishda davom etmoqchi.
Leonardoning strategik rejasi platformalarni integratsiyalash va raqamlashtirish, sanoatdagi hamkorlikni rivojlantirish hamda maqsadli M&A bitimlariga asoslanadi. Kompaniya rahbari korporativ press-relizda taʼkidlaganidek, bu guruhga oʻzgarayotgan jahon AD&S (aerokosmik soha, mudofaa va xavfsizlik) sanoatida muhim oʻrin egallashga va bozor talablariga tezroq moslashishga yordam berishi kerak.
