Mazovetskiy voyevodaligida «Polsha — Oʻzbekiston» logistika xabi ish boshladi
Maydoni 1 ming kvadrat metr boʻlgan ushbu maskan Oʻzbekiston mahsulotlarini Markaziy va Sharqiy Yevropadagi savdo tarmoqlariga yetkazib berishni tezlashtirishi kerak.
Xab Oʻzbekistonlik tadbirkorlar delegatsiyasining Yevropa Ittifoqi grant loyihasi doirasida Polshaga tashrifi davomida Mazovetskiy voyevodaligidagi ATT Logistics bazasida tashkil etildi. Kompaniya Yevropa Ittifoqi va MDH mamlakatlari oʻrtasida xalqaro yuk tashish bilan shugʻullanadi, uning tasarrufida Euro-6 standartidagi 100 dan ortiq yuk mashinasi hamda 15 ming kvadrat metrdan ziyod ombor maydoni bor.
Maydon tovar ayirboshlash hajmini oshirish va Oʻzbekiston kompaniyalarining Yevropa bozoriga chiqishini osonlashtirish uchun moʻljallangan. Biznes-missiya davomida transport-logistika yoʻlaklari, yuk tashishdagi muammolar hamda Polsha tashkilotlari va kompaniyalari bilan amalga oshirilishi mumkin boʻlgan qoʻshma loyihalar ham muhokama qilindi.
Belostokda ishtirokchilar mintaqadagi logistika kompaniyalari vakillari bilan davra suhbati oʻtkazdi. Tashrif yakunida Toshkent viloyati va Polsha hududlari oʻrtasidagi savdo-iqtisodiy aloqalarni mustahkamlash uchun asos yaratildi.
