Hyundai 2032 yilgacha Hindiston avtomobil sektoriga 15,5 mlrd dollar investitsiya kiritadi
Investitsiyalar ishlab chiqarishni kengaytirish, texnologiyalarni rivojlantirish va mahalliy yetkazib beruvchilar ekotizimini yaratishga yoʻnaltiriladi, deya xabar berdi kompaniya.
Hyundai Motor Group 2026–2032 yillarda Hindiston avtomobil sektorini rivojlantirishga 15,5 mlrd dollar investitsiya kiritadi. Mablagʻlar yangi ishlab chiqarish quvvatlarini barpo etish, tadqiqot va ishlanmalar infratuzilmasini rivojlantirish, shuningdek, butlovchi qismlarning mahalliy yetkazib beruvchilari hamda innovatsion texnologiyalarni qoʻllab-quvvatlashga yoʻnaltiriladi.
Investitsiyalar Hindistonda maxsus tashkil etilgan kompaniya orqali muvofiqlashtiriladi. Rejani Hyundai kompaniyasining ijrochi raisi Euisun Chung va Hindiston bosh vaziri Narendra Modi muhokama qildi. Loyiha doirasida ishlab chiqarish, tadqiqot va ishlanmalar hamda turdosh sohalarda ish oʻrinlari yaratilishi kutilmoqda. Hozirda Hyundai Hindistonda yiliga 1,4 mln.dan ortiq avtomobil ishlab chiqaradi.
