Toshkent obligatsiyalar chiqarish orqali xalqaro kapital bozoriga chiqish imkoniyatini oʻrganmoqda
Amerikaning Oppenheimer kompaniyasi bilan tuzilgan kelishuv poytaxtning xorijiy investorlar bilan aloqalarini kuchaytiradi
Toshkent shahar hokimiyatiga rahbarlik qilayotgan Shavkat Umurzakov Oppenheimer & Co. kompaniyasining investitsiya-bank yoʻnalishi rahbari, EMEA mintaqasi (Yevropa, Yaqin Sharq va Afrika) boʻyicha bosh ijrochi direktori Maks Lami bilan muzokara oʻtkazdi. Uchrashuvda shaharning xorijiy kapital bozorlariga chiqishi va infratuzilma hamda shaharsozlik loyihalarini moliyalashtirish uchun munitsipal obligatsiyalar chiqarishi mumkinligi muhokama qilindi.
Suhbat markazida davlat-xususiy sheriklik, xalqaro darajadagi moliyaviy vositalar, shahar moliyasini boshqarish boʻyicha xorijiy tajriba va mahalliy mutaxassislarni tayyorlash masalalari ham boʻldi. Tomonlar uchrashuvni oʻzaro hamkorlik toʻgʻrisidagi kelishuv bilan yakunladi.
Hokimiyat obligatsiyalar moliyalashtirish manbai boʻlishi mumkin boʻlgan loyihalar roʻyxati, ularning taxminiy hajmi, chiqarish muddatlari va shartlarini oshkor qilmadi. Kompaniyaning obligatsiyalarni joylashtirishni tashkil etishdagi ishtiroki ham aniqlashtirilmagan.
Joriy yil 16 aprel kuni prezident huzuridagi yigʻilishda poytaxt uchun bir yil ichida yevroobligatsiyalar orqali 500 mln dollar jalb etish taklif qilingan edi.
