Tramp Grenlandiyada neft, gaz va minerallarni keng koʻlamda qidirish ishlari haqida maʼlum qildi
AQSh prezidenti orolda oson qazib olinadigan neftning dunyodagi eng yirik zaxiralari borligini aytdi, biroq ishlar qachon boshlanishini maʼlum qilmadi.
AQSh prezidenti Donald Tramp Truth Social tarmogʻida Grenlandiyada neft, gaz va minerallarni «ulkan miqyosda» qidirishga tayyorgarlik koʻrilayotganini maʼlum qildi. Uning soʻzlariga koʻra, oroldagi oson qazib olinadigan neft zaxiralari dunyoning aksariyat mintaqalaridagidan koʻp, resurslar esa AQSh va Yevropa xavfsizligi uchun nihoyatda muhim.
Tramp geologik qidiruv ishlari qachon boshlanishini aytmadi. AQShning U.S. Greenland Energy Company kompaniyasi avvalroq orol maʼmuriyati bilan uskunalarni muvofiqlashtirishdagi muammolar sabab Sharqiy Grenlandiyada ikkita quduq burgʻilashni 2027-yil qishigacha kechiktirgandi.
Grenlandiyada uglevodorodlar va noyob yer metallari katta miqdorda mavjud, biroq ularni qazib olish infratuzilmaning yoʻqligi, ogʻir iqlim sharoiti va yuqori xarajatlar sabab qiyin. Wood Mackenzie tahlilchilarining taʼkidlashicha, loyihalarning iqtisodiy jihatdan samarasizligi tufayli orol «ikkinchi Venesuela»ga aylanmaydi.
