Samsung kompaniyasining sobiq vitse-prezidenti kompaniya sirlarini oʻgʻirlagani uchun uch yilga qamoqqa yuborildi
An Syn Hoga kompaniyaning ichki hisobotlarini yetkazgan Samsungning ikki sobiq xodimiga ham jazolar kuchaytirildi.
Seul apellyatsiya sudi Samsung Electronics kompaniyasining sobiq vitse-prezidenti An Syn Hoga tijorat siri bilan bogʻliq patent nizosi boʻyicha berilgan uch yillik hukmni tasdiqladi. Sud tomonlarning shikoyatlarini rad etdi, garovni bekor qildi va An Syn Honi darhol hibsga olish haqida qaror chiqardi.
An Syn Ho avval Samsung Electronics kompaniyasining Intellektual mulk markaziga rahbarlik qilgan, keyin esa Synergy IP kompaniyasini tashkil etgan. U AQShda Samsungga qarshi kechgan sud jarayonida patentlar baholari, texnik tahlil va himoya variantlari keltirilgan ichki hisobotdan foydalangan.
Sud bu maʼlumotlarni tijorat siri deb topdi: ular patent litsenziyalari boʻyicha muzokaralarda kompaniyaning mavqeini kuchaytirishi mumkin edi. Sud versiyasiga koʻra, Samsung xodimlari hujjatlarni kirish tizimidagi zaifliklardan foydalanib qoʻlga kiritgan.
An Syn Hoga maxfiy hisobotlarni yetkazgan markazning sobiq xodimiga ikki yil oʻrniga uch yil, Samsung Display boʻlinmasining sobiq rahbariga esa uch yil oʻrniga toʻrt yil jazo tayinlandi; ikkalasining ham garovi bekor qilindi. Avvalroq AQSh sudi ichki maʼlumotlardan tegishli tarzda foydalanilmagani sababli Samsungga qarshi patent daʼvosini rad etgan edi. Shundan soʻng Synergy IP kompaniya bilan tuzilgan kelishuvga koʻra apellyatsiyasini qaytarib oldi.
