AQShda qurilish chizmalarini bir necha daqiqada yaratadigan sunʼiy intellekt xizmati ishlab chiqildi
Amerikaning Blueprints AI startapi sunʼiy intellekt yordamida eskizlar va matnli tavsiflar asosida qurilish hujjatlarini yaratadigan yangilangan platformasini taqdim etadi, deb xabar bermoqda TechCrunch.
Kompaniyaga 2025-yilda arxitektor El Dram va maʼlumotlarni tahlil qilish boʻyicha mutaxassis Koko Tsao asos solgan. Sunʼiy intellektni oʻqitish uchun ular Dramning arxitektura firmasi sakkiz yil davomida toʻplagan qurilish loyihalari arxividan foydalangan.
Xizmatning birinchi versiyasi arxitektura chizmalarini yaratish imkonini beradi. Ikkinchi versiyada ishlab chiquvchilar muhandislik tizimlarini loyihalash, hujjatlarni tahrirlash hamda oʻzgarishlarning mahalliy qurilish meʼyorlariga muvofiqligini avtomatik tekshirish funksiyalarini qoʻshgan.
Yangilangan platformani oktabr oyida keng omma uchun ochiq qilish rejalashtirilmoqda. Hozir startap uchinchi versiya ustida ishlamoqda. Unda konstruksiyalarni hisoblash va elektr shitlarini loyihalash vositalari boʻladi.
Ishlab chiquvchilar sunʼiy intellekt arxitektorlarning oʻrnini bosmasligini taʼkidlamoqda: tayyor hujjatlar hamon litsenziyaga ega mutaxassislar tomonidan tekshirilishi va tasdiqlanishi kerak.
