Jio aksiyalari Hindistondagi yirik IPOdan keyingi bozor debyutida 21 foizga oʻsdi
Aksiyalarni joylashtirish uchun 77 mlrd dollardan ortiq miqdorda arizalar kelib tushdi va bu Hindistondagi eng yirik hamda eng katta talabga ega IPO boʻldi.
Savdolar ochilganda Jio Platforms aksiyalarining narxi taxminan 14,3 dollarni tashkil etdi. Bu 11,8 dollarlik joylashtirish narxidan 21 foizga yuqori. Bozor kompaniyani taxminan 132 mlrd dollarga baholadi va u Reliance Industriesʼdan keyin Hindistondagi qiymati boʻyicha ikkinchi yirik ommaviy kompaniyaga aylandi.
Jio Platforms — Meta va Google sarmoya kiritgan Reliance Industries kompaniyasining telekommunikatsiya va raqamli boʻlinmasi. Kompaniya jalb qilingan mablagʻlarning asosiy qismini Reliance Jio Infocomm shoʻba korxonasining qarzlarini toʻlashga, qolganini esa umumkorporativ maqsadlarga yoʻnaltiradi.
Jio Hindistondagi eng yirik aloqa operatori boʻlib qolmoqda va keng polosali internet, bulutli xizmatlar hamda sunʼiy intellekt yoʻnalishlarini rivojlantirmoqda. Listing marosimida kompaniya oʻz platformalaridan 540 mln nafardan ortiq mijoz foydalanishini maʼlum qildi.
