Estoniyada asfalt tanqisligi yuzaga keldi
Xomashyo yetkazib berishdagi uzilishlar asfalt-beton korxonalari uchun material tanqisligiga olib keldi va Tallindagi yoʻl ishlariga taʼsir koʻrsatdi.
Estoniya yoʻl quruvchilari asfalt tanqisligiga duch keldi: mamlakatga yoʻl qoplamasi uchun asosiy xomashyo boʻlgan bitum kelmay qoʻydi. Vaziyatni Tallin meriyasi matbuot anjumanida vitse-mer Kristyan Yarvan maʼlum qildi, deb xabar berdi ERR.
Odatda Estoniya bitumni ikki kompaniyadan xarid qiladi, hozir esa turli sabablarga koʻra har ikkisi ham taʼminot zanjiridan chiqib qoldi. Shvetsiyalik yetkazib beruvchi sabablarini tushuntirmagan holda joʻnatmalarni toʻxtatdi. U taxminan uch hafta oldin kelgan tanker bu yilgi soʻnggi tanker boʻlganini, keyingi partiya esa faqat bahorda kelishini maʼlum qildi.
Litvalik hamkor bilan muammolar avval narxlarning oshishi bilan boshlandi, keyin esa uning zavodida avariya yuz berdi. Natijada Estoniyadagi asfalt-beton zavodlarida qoplama ishlab chiqarish uchun xomashyo qolmadi. Tanqislik allaqachon Tallindagi yoʻllarni taʼmirlash ishlariga taʼsir koʻrsatdi.
