Anthropic sunʼiy intellekt yordamida dori vositalarini ishlab chiqayotgan bir xodimli startapni sotib oldi
Bitim tuzilishidan oldin kompaniyada faqat uning asoschisi Kodi Tranbarger ishlagan. Claude unga tajribalarni rejalashtirish va 11 ta tashqi laboratoriya ishini muvofiqlashtirishda yordam bergan.
Anthropic Mithril Medicine startapini sotib oldi. Ushbu startap bolalar mushak distrofiyasining ikki kam uchraydigan shakliga qarshi dori vositalarini ishlab chiqmoqda: LAMA2 geni bilan bogʻliq tugʻma distrofiya va alfa-distroglikanopatiya.
Anthropic maʼlumotlariga koʻra, dori nomzodlaridan biri gʻoyadan sichqonlarda umidbaxsh natijalargacha boʻlgan yoʻlni bir yarim yildan kamroq vaqt ichida bosib oʻtgan. Agar ishlar muvaffaqiyatli ketsa, odamlarda klinik sinovlar 2028-yil oxirida boshlanishi mumkin. Hozircha tadqiqotlar klinikagacha boʻlgan bosqichda, dori vositalarining odamlar uchun xavfsizligi va samaradorligi tasdiqlanmagan.
Tranbarger Anthropicʼning dori vositalarini ishlab chiqish boʻyicha ichki dasturlariga rahbarlik qiladi. Bundan tashqari, kompaniya oltita farmatsevtika va biotexnologiya tashkiloti bilan hamkorlik qilmoqda. Ular orasida Bristol Myers Squibb va BigHat Biosciences ham bor. Bu tashkilotlarda Claude turli bosqichlarda — molekulalarni loyihalashdan tortib, regulyatorlar uchun hujjatlarni tayyorlash va klinik sinovlarni rejalashtirishgacha — yordam bermoqda.
