ServiceNow va Fortinet kompaniyalarining hafsalani pir qilgan natijalari tufayli SAP aksiyalari pasaymoqda
Investorlar sunʼiy intellektning yangi modellari dasturiy taʼminot ishlab chiquvchilarining anʼanaviy biznes modellarini izdan chiqara oladimi-yoʻqmi, shuni baholamoqda.
Raqobatchilar natijalari eʼlon qilinganidan soʻng, payshanba kuni bozor ochilishidan oldingi savdolarda SAP aksiyalari qariyb 2 foizga pasaydi. Bu sunʼiy intellektning sektorga taʼsiri borasidagi bozor xavotirlarini kuchaytirdi.
Yillik prognoz oshirilganiga qaramay, Fortinet aksiyalari 27 foizga qulab tushdi. Investorlarni xizmatlardan olinadigan tushum oʻsishining sekinlashgani, ayniqsa kompaniya aksiyalari yil boshidan buyon 119 foizga oshgan bir paytda, hafsalasini pir qildi.
ServiceNow aksiyalari kompaniya uchinchi chorakdagi foyda boʻyicha kutilmalarni oqlay olmaganidan soʻng 18 foizdan koʻproqqa arzonlashdi. Bir nechta brokerlar ikkala kompaniya uchun ham maqsadli narxlarni pasaytirdi. Bunda ServiceNowʼning obuna tushumlari va buyurtmalar portfelidagi sust dinamika ham sabab qilib koʻrsatildi.
Berenberg tahlilchisi Nay So Nayngning qayd etishicha, ikkala kompaniya ham yillik moʻljallarini oshirgan boʻlsa-da, ularning toʻrtinchi chorak uchun prognozlari zaif koʻrinmoqda.
