Kuchli chorakka qaramay, Figma aksiyalari 6 foizga tushdi
Payshanba kungi premarket savdolarida Figma aksiyalari qariyb 6 foizga arzonlab, $20,82 gacha tushdi.
Kompaniyaning choraklik hisoboti kutilganidan yaxshiroq chiqdi, biroq investorlarni uning strategiyasi xavotirga soldi: kompaniya sunʼiy intellektni tezroq joriy etish uchun yaqin istiqbolda tushum va marjadan voz kechishga tayyor.
Uchinchi chorakda aksiyaga toʻgʻri keladigan tuzatilgan foyda $0,10 ni tashkil etdi — konsensus prognozidan ($0,05) ikki baravar koʻp. Tushum esa Uoll-stritning $375,8 mlnlik kutilmasiga qarshi $391,4 mln ga yetdi. Shunga qaramay, chorshanba kungi kengaytirilgan savdolardayoq aksiyalar pasaya boshladi.
Xavotirning asosiy sababi — marja. Tuzatilgan yalpi marja bir yil avvalgi 86 foizdan 82 foizgacha pasaydi, chunki AI inferensiyasiga ketadigan xarajatlar oshmoqda. Bundan tashqari, kompaniya narxlarni oshirmagan holda mijozlarga koʻproq AI kreditlari bera boshladi. Rahbariyat buni tezkor monetizatsiyaga emas, uzoq muddatda dollar hisobidagi yalpi foydani oshirishga eʼtibor qaratayotgani bilan izohladi. Bosh direktor Dilan Fild kod ommaviy tovarga aylanib borar ekan, qiymat dizayn tomon siljiydi, deb hisoblaydi. Biroq bozorni yaqin istiqboldagi moliyaviy koʻrsatkichlar koʻproq tashvishga solmoqda.
Tahlilchilar ham bosimni kuchaytirdi. JPMorgan Figma aksiyalari boʻyicha maqsadli narxni $28 dan $24 gacha pasaytirib, «neytral» reytingini saqlab qoldi. Oppenheimer esa aksiyalar qimmatligini sabab qilib, «bozor darajasida» bahosini tasdiqladi. Umumiy bozor foni ham salbiy boʻldi: Nasdaq indeksi shu kuni 1,2 foizga pasaydi.
Hozir Figma aksiyalari oʻzining 52 haftalik maksimumidan ($46,79) ikki baravardan ham koʻproq pastda va minimumiga ($16,60) ancha yaqin turibdi. Investorlar dizayn uchun AI-nativ vositalar tomonidan yuzaga keladigan raqobatdan, shuningdek, bozordagi yetakchilik uchun kurash kompaniyaga qanchaga tushishidan xavotirda.
