Tahlilchilar Anthropic 10 trln dollarlik qiymatga ega boʻla oladimi, deya baholadi
Sunʼiy intellekt startapining yillik daromadi 70 mlrd dollardan oshdi, inferens marjasi esa zarar koʻrsatkichidan 85 foizlik ijobiy natijagacha keskin yaxshilandi
The Vergeʼga intervyu bergan moliyaviy tahlilchilar sunʼiy intellekt ishlab chiquvchisi Anthropic kompaniyasining IPO prospektini oʻrganib, uning kapitallashuvi 10 trln dollarga yetishi istiqbollarini baholadi. Ekspertlar kompaniyaning birlik iqtisodiyoti jadal mustahkamlanayotgani va startap biznes-modelining yuqori samaradorligini qayd etmoqda.
Anthropicʼning yillik takrorlanuvchi daromadi (ARR) 70 mlrd dollardan oshdi. Shu bilan birga, inferens boʻyicha yalpi marja rekord darajada oʻzgardi — ikki yil avvalgi minus 94 foizdan 85 foizlik ijobiy koʻrsatkichgacha yetdi. Haqiqiy sof pul mablagʻlari chiqimi atigi 10 mlrd dollarni tashkil etdi, balansdagi likvid mablagʻlar esa 120 mlrd dollardan oshadi. Hisobotda qayd etilgan 80 mlrd dollarlik zararni ekspertlar kompaniya qiymatining qayta baholanishi sabab yuzaga kelgan, real yoʻqotishlar bilan bogʻliq boʻlmagan buxgalteriya hisobidagi naqdsiz hisobdan chiqarish, deb atamoqda.
Optimistik baholarning asosi hisoblash quvvatlaridan olinayotgan yuqori daromad boʻlib qolmoqda. Anthropic inferensning har bir megavati hisobiga qariyb 65 mln dollar daromad oladi, yangi avlod chiplariga oʻtish esa bu koʻrsatkichni 100–120 mln dollargacha oshirishi mumkin. Bunday marja kompaniyaga serverlarni ijaraga olish boʻyicha uzoq muddatli majburiyatlarini — 7–10 yilga 500 mlrd dollarni — daromadni zudlik bilan trillion dollarlik darajaga olib chiqish zaruratisiz, ishonchli tarzda bajarish imkonini beradi.
10 trln dollarlik kapitallashuvga erishish uchun kompaniya kod yozish segmentidan tashqariga chiqib, moliya, huquq va kiberxavfsizlik sohalarida mustahkam oʻrin egallashi kerak. Hozirda Fortune 500 roʻyxatidagi kompaniyalarning yarmida Anthropic xizmatlariga sarflanadigan xarajatlar operatsion xarajatlarning atigi 0,1 foizini tashkil etadi. Bu esa keyingi oʻsish uchun ulkan imkoniyat borligidan dalolat beradi.
Ekspertlar keskin oʻsishni cheklashi mumkin boʻlgan omillar qatorida OpenAI, Google va tez rivojlanayotgan ochiq kodli modellar tomonidan yuzaga kelayotgan nihoyatda kuchli raqobatni, bir vaqtning oʻzida sunʼiy intellekt bozorida Anthropicʼning bevosita raqiblari ham boʻlgan bulutli provayderlarga infratuzilmaviy qaramlikni, shuningdek, neyron tarmoqlarning iqtisodiyotning anʼanaviy tarmoqlariga joriy etilish surʼatining noaniqligini sanamoqda.
Shu bilan birga, tahlilchilar xulosa qilishicha, agar kompaniya texnologik yetakchiligini saqlab qolsa, investorlar ulushlarining hozirgi darajada suyulishi biznesning uzoq muddatli koʻlami hisobiga toʻliq qoplanadi.
