Rekord: Oʻzbekistonda 5 mln tonnadan ortiq paxta yigʻib olindi
Mamlakat boʻylab ekin maydonlari uchdan biridan koʻproqqa qisqargan boʻlsa-da, hosildorlik oshdi
Oʻzbekistonda paxtachilik sohasida tarixiy rekord qayd etildi: ilk bor 5 mln tonnadan ortiq chigitli paxta yigʻib olindi.
Ekin maydonlari 38 foizga qisqarganiga qaramay, mamlakatdagi oʻrtacha hosildorlik gektariga 21 sentnerdan 56 sentnergacha (2,7 baravar) oshdi. Resurslarni tejovchi texnologiyalar joriy etilgani hisobiga suv sarfi esa 1990-yillarga nisbatan ikki baravarga kamaydi.
Taqqoslash uchun, 2000-yilda 1,4 mln gektar maydonga paxta ekilib, 3 mln tonna chigitli paxta yigʻib olingan. Joriy mavsumda esa qariyb 400 ming gektarda hosildorlik 70 sentnergacha, 70 ming gektarda esa 100–110 sentner/gektarga yetdi. Mingga yaqin fermer xoʻjaligi va klaster gektaridan 100 sentnerlik marradan oshdi. Hududlar orasida Jizzax, Xorazm, Buxoro, Navoiy va Sirdaryo viloyatlari (gektaridan 60 sentnerdan ortiq), tumanlar orasida esa Koson (110 ming tonna) va Mirishkor (105 ming tonna) yetakchilik qildi.
Muvaffaqiyatning asosiy omillari keng koʻlamli mexanizatsiya va raqamlashtirish boʻldi. Hosilning qariyb 85 foizi 30–35 kun ichida 3 mingdan ortiq paxta terish kombayni yordamida yigʻib olindi. Jizzax va Sirdaryo viloyatlarida mexanizatsiya darajasi 100 foizga yetdi. Agrodrone va raqamli tizimlardan foydalanish xarajatlarni ikki baravarga qisqartirish imkonini berdi.
Keyingi mavsumda yuqori mahsuldor urugʻlar, energiya tejamkor texnologiyalar va sunʼiy intellekt elementlarini joriy etish hisobiga mamlakat boʻyicha oʻrtacha hosildorlik meʼyori gektariga 65–70 sentnergacha koʻtariladi.
