Buxoroda 300 mln dollarlik yangi aeroport qurilmoqda
300 mln dollarlik Buxoro xalqaro aeroporti bir vaqtda 20 ta samolyot va 1 200 yoʻlovchiga xizmat koʻrsata oladi.
Loyiha xalqaro meʼyorlar asosida amalga oshiriladi. Shavkat Mirziyoyev Mustaqillik kunini nishonlashga qadar aeroport va unga olib boruvchi yoʻl qurilishini yakunlashni topshirdi.
Obyekt shaharga 24 km uzunlikdagi avtomobil yoʻli orqali ulanadi. Avtobuslar uchun 5,5 km uzunlikdagi BRT yoʻlagi ajratiladi. Hokimiyat Buxoroga kelishni osonlashtirish va mintaqaning transport imkoniyatlarini kengaytirishni kutmoqda.
Turkiyaning Pegasus aviakompaniyasi Buxoroga toʻgʻridan-toʻgʻri reyslarni yoʻlga qoʻyadi. Kelasi yil Malayziya, Indoneziya, Quvayt, Misr va Bahrayn bilan havo qatnovini yoʻlga qoʻyish rejalashtirilgan.
Shu bilan birga, mintaqada turistik loyihalar tayyorlanmoqda. Gulchorbogʻ mahallasidagi 50 gektar maydonda 80 mln dollarlik markaz barpo etiladi. U koʻrgazmalar zali, amfiteatr va mehmonxonalarni oʻz ichiga oladi.
Jalol Ikromiy mahallasida xalqaro tadbirlar oʻtkazish uchun 60 mln dollarlik kongress zali qurilmoqda. Uning yonida yetti qavatli ikkita mehmonxona — Hilton va Holiday Inn barpo etilmoqda.
Buxoro tumanida 1 ming gektar maydonda 500 mln dollarlik turistik klaster joylashtirilishi rejalashtirilgan. Shuningdek, markazdagi sakkizta koʻcha yangilanadi va oltita skver obodonlashtiriladi. Eski shahar hududidagi tarixiy majmualar — Yetti pir, Chor-Bakr, Poykent, Varaxsha va Vardonze — yagona turistik konsepsiyaga birlashtiriladi.
