Lufthansa yoqilgʻi narxlari oshgan bir paytda choraklik daromad boʻyicha rekord qayd etdi
Iyul–sentabr oylarida Lufthansa guruhining daromadi yillik hisobda 9 foizga oshib, 12,24 mlrd yevroni tashkil etdi. Bu kompaniya uchun rekord koʻrsatkichdir.
Tuzatilgan operatsion foyda 6 foizga oshib, 1,4 mlrd yevroga yetdi. Daromadlarning koʻpayishi va xarajatlarning qisqarishi yoqilgʻining qimmatlashishini qopladi: Yaqin Sharqdagi mojaro fonida yoqilgʻi xarajatlari 543 mln yevroga oshdi.
Natijaga asosiy hissani Lufthansa Cargo boʻlinmalari qoʻshdi — ularning foydasi uch baravardan koʻproqqa oshib, 162 mln yevroga yetdi. Lufthansa Technik kompaniyasining foydasi esa 54 foizga oshib, 200 mln yevroni tashkil etdi. Asosiy aviakompaniya — Lufthansaʼda esa foyda, aksincha, uchdan biriga qisqarib, 300 mln yevroga tushdi.
Xarajatlarni kamaytirish uchun guruh qisqa yoʻnalishlardagi qariyb 20 000 ta reysni qisqartirdi, 27 ta CityLine samolyotini parvozlar jadvalidan chiqardi va xarajatlar ustidan nazoratni kuchaytirdi. Bundan tashqari, kompaniya 2030 yilgacha maʼmuriy lavozimlar sonini 4000 taga qisqartirishni rejalashtirmoqda.
Endi 2026 yil uchun yoqilgʻi xarajatlari 9,3 mlrd yevro darajasida boʻlishi kutilmoqda. Bu avvalgi yilga nisbatan qariyb 2 mlrd yevroga koʻp. Yillik tuzatilgan operatsion foyda prognozi 1,7–2 mlrd yevrogacha pasaytirildi, avval yuqori chegara 2,2 mlrd yevro edi. Hisobot eʼlon qilinganidan soʻng Lufthansa aksiyalari 3 foizdan koʻproqqa qimmatlashdi.
