Isitish kutilganidan koʻproq qimmatlashadi: Markaziy bank inflyatsiya prognozini 7 foizgacha oshirdi
Oʻzbekiston Markaziy banki 2026 yil oxiridagi inflyatsiya prognozini 6,5 foizdan 7 foizgacha oshirdi. Isitish va issiq suv tariflarini oshirish boʻyicha eʼlon qilingan parametrlar regulyator avval hisobga olgan koʻrsatkichlardan yuqori boʻlib chiqdi.
Prognozning qayta koʻrib chiqilishiga 4 noyabr kuni boʻlib oʻtgan matbuot anjumanida Markaziy bank Monetar siyosat departamenti direktori Samigjon Inogamov izoh berdi.
Uning soʻzlariga koʻra, issiqlik taʼminoti tariflarining oshishi inflyatsiyaning avvalgi bahosida allaqachon hisobga olingan edi. Biroq aniq parametrlar eʼlon qilingach, hisob-kitoblarni yangilashga toʻgʻri keldi. Bu oʻzgarishlar asosiy stavkani 14 foiz darajasida saqlab qolish omillaridan biriga aylandi.
Markaziy bank raisining oʻrinbosari Nodirbek Achilov 7 foizlik prognoz tartibga solinadigan narxlardagi, jumladan isitish va issiq suv tariflaridagi barcha eʼlon qilingan oʻzgarishlarni allaqachon oʻz ichiga olganini aniqlik kiritdi.
Shu bilan birga, yigʻilishda asosiy stavkani oshirish masalasi muhokama qilinmadi. Boshqaruv ikki variantni koʻrib chiqdi: stavkani 14 foiz darajasida saqlab qolish yoki 13,5 foizgacha pasaytirish.
Regulyator tariflardagi oʻzgarishlarning bevosita taʼsirini asosan bir martalik deb hisoblaydi. Qatʼiy pul-kredit siyosatining saqlab qolinishi ikkilamchi taʼsirlarni — qimmatlashuvning boshqa tovarlar va xizmatlarga yoyilishini hamda inflyatsion kutilmalarning oshishini — cheklashi kerak.
7 foizlik prognoz kommunal tariflarning oshish miqdoriga emas, isteʼmol narxlarining yil davomida umumiy oʻsishiga taalluqli.
