Rivojlanayotgan mamlakatlarning tashqi qarzi $9,4 trln gacha oshdi
Rivojlanayotgan mamlakatlarning tashqi qarzi 2025-yilda 5,5 foizga oshib, rekord darajadagi $9,4 trln ga yetdi. Bunday maʼlumotlar Jahon bankining International Debt Report 2026 hisobotida keltirilgan. Qarz bundan tezroq faqat 2021-yilda oʻsgan.
Yangi qarzlarning eng katta qismi xususiy kreditorlar hissasiga toʻgʻri keldi. Rivojlanayotgan mamlakatlarning davlat tashkilotlari $251 mlrd miqdorida obligatsiyalar chiqardi — bu bir yil avvalgidan qariyb 35 foiz koʻp.
Shu bilan birga, qarz olish qimmatlashdi. Xalqaro taraqqiyot assotsiatsiyasidan imtiyozli moliyalashtirish olish imkoniga ega eng kambagʻal mamlakatlar xususiy kreditorlarga yiliga oʻrtacha 8,2 foiz toʻladi. Bu 1989-yildan beri eng yuqori koʻrsatkichdir. Ularning tashqi qarzi 8,1 foizga oshib, $1,3 trln ga yetdi.
Umuman olganda, daromadi past va oʻrtacha boʻlgan mamlakatlar qarzlarni qaytarish hamda foiz toʻlovlariga $1,4 trln sarfladi. Jahon banki bahosiga koʻra, buning oqibatida ularda rivojlanish va ijtimoiy sohaga yoʻnaltirish uchun kamroq mablagʻ qolmoqda.
