Moskvada Yevropadagi eng baland turar joy osmonoʻpar binosi quriladi: yangi render paydo boʻldi
Moskvadagi «Siti-2» hududida qurilishi rejalashtirilayotgan 450 metrlik turar joy minorasining yangi vizual tasviri paydo boʻldi.
Konsepsiya oʻzgarishsiz qoldi: bino «Jenga» stol oʻyinini eslatadi. Minora bir-biriga nisbatan siljigan bloklardan quriladi, bloklar siljigan joylarda esa ochiq teraslar paydo boʻladi.
Elita toifasidagi turar joy majmuasi 225,4 ming kvadrat metr maydonni egallaydi. Osmonoʻpar binoda yer ustidagi 95 qavat va yana beshta yerosti qavati boʻladi, xonadonlar soni esa 1018 tani tashkil etadi. Ularning qariyb uchdan bir qismi oʻz terrasasiga ega boʻladi. Aholi uchun basseyn va spa markaziga ega premium toifadagi fitnes-klub, yopiq klub hududlari, yuqori qavatlarda esa shaharning panoramali manzarasiga ega restoranlar koʻzda tutilgan.
Majmuadan park va savdo galereyalari joylashgan jamoat makoniga bevosita chiqish mumkin boʻladi. Loyiha mualliflari bu joy butun hudud aholisi uchun diqqatga sazovor maskanga aylanishiga umid qilmoqda.
Mosgosstroynadzor qurilish uchun ruxsatnomani oktabr oʻrtalarida berdi. Qurilish maydonida allaqachon tayyorgarlik ishlari ketmoqda — hozir u yerda qoziqlar sinovdan oʻtkazilmoqda. Minora qurib bitkazilgach, Yevropadagi eng baland turar joy binosiga aylanadi.
Yevropadagi eng baland bino unvoni hozircha balandligi 462 metr boʻlgan Sankt-Peterburgdagi «Lakhta Center»da qolmoqda. Biroq uning ham balandroq qoʻshnisi paydo boʻlishi mumkin: avgust oyida Glavgosekspertiza «Lakhta Center – 2» loyiha hujjatlarini maʼqulladi, ikkinchi minoraning balandligi 703 metrni tashkil etadi.
